អក្សរសាស្ត្រខ្មែរ: ដោះស្រាយបញ្ហា Laptop កើនកម្ដៅ

កុំឲ្យខាត ដាក់ពងទាចៀនមួយសិន :D

បាទថ្ងៃនេះប្លកអាក្បាលធំមានគន្លឹះមួយ ដែលនិយាយអំពីបញ្ហាកម្ដៅរបស់ម៉ាស៊ីនកុំព្យូទ័រចល័តគឺ laptop ។ នៅពេលដែលលោកអ្នកប្រើប្រាស់ Laptop ក្នុងរយៈពេលយូរៗទៅនោះ ការឡើងកម្ដៅគឺជារឿងធម្មតាទេ នោះមកពីមានធូលីដីកាន់ច្រើន និងកង្ហារថមថយល្បឿនបក់។ កម្ដៅរបស់ Laptop នឹងកើនឡើងជាក់ជាមិនខាន បើសីតុណ្ហភាពនៅជុំវិញមិនល្អ បើលោកអ្នកប្រើប្រាស់ laptop ក្នុងក្នុងបន្ទប់ដែលមានម៉ាស៊ីនត្រជាក់នោះ កម្ដៅមិនមានបញ្ហាអ្វីទេ។ ប៉ុន្តែអ្វីដែលជាបញ្ហាចោទសំខាន់នោះគឺ បរិស្ថានជុំវិញគ្មានភាពត្រជាក់ និង laptop ចាស់ៗ កម្ដៅវានឹងឈានដល់កម្រិតមួយ អាចប៉ះពាល់ដល់អាយុជីវិតគ្រឿងរឹង (Hardware) របស់ laptop ផ្សេងទៀតនៅពេលដែលអ្នកប្រើប្រាស់មិនទាន់ចេះគ្រប់គ្រង ឬមិនទាន់ស្គាល់ចិត្តវា ៖

តើយើងគួរធ្វើយ៉ាងម៉េចទើបអាចការពារមិនឲ្យវាឡើងកម្ដៅបាន?

ជាទូទៅនៅពេលដែលកុំព្យូទ័រឡើងកម្ដៅខ្លាំងកង្ហារនៅខាងក្នុង ម៉ាស៊ីនវានឹងបញ្ចេញសំឡេងខុសពីធម្មតា ពេលនោះ CPU វានឹងបន្ថយល្បឿននាឡិកា (Clock speed) ដើម្បីការពារសំពាធកម្ដៅនោះ។ នៅពេលដែលអ្នកប្រើប្រាស់នៅតែបន្តប្រើវាទៀតកុំព្យូទ័រនឹងរលត់ ភ្លាម។

អ្វីទៅបង្កឲ្យឡើងកម្ដៅបែបនេះ?

បញ្ហាចម្បងគឺ មិនមានធាតុត្រជាក់គ្រប់គ្រាន់ ពោលគឺកង្ហារ (Fan) នៅក្នុងម៉ាស៊ីនមានកម្ទេចធូលីផ្សេងៗជាប់ជាមួយស្លាបកង្ហារ CPU ដែលជាហេតុធ្វើឲ្យវា មិនអាចផ្ដល់ធាតុត្រជាក់គ្រប់គ្រាន់ដល់ CPU។ មិនថាតែ CPU ទេ Power supply ក៏ដូច្នេះដែរ។

៙ វិធីបន្ថយកម្ដៅ ៖

មុននឹងសម្អាត ត្រូវផ្ដាច់ចរន្តអគ្គិសនីសិន បិទកុំព្យូទ័របន្ទាប់មកដោះថ្មចេញ និង ដោះឌុយភ្លើងចេញ។ សំអាតកម្ទេចធូលីចេញពីកង្ហារ ដោយប្រើក្រណាត់ទន់ Cotton សុទ្ធជ្រលក់ជាមួយនឹងទឹកអាល់កុលជូតសម្អាតថ្នមៗ តែបើយល់ល្អអ្នកត្រូវប្រើប្រដាប់ផ្លុំធូលីល្អជាង វាជួយកាត់បន្ថយមិនឲ្យប៉ះពាល់ដល់គ្រឿងរឹង ដោយសារការប្រើជាមួយក្រណាត់សើម។
ត្រូវដាក់ Laptop នៅលើផ្ទៃរឹង និងរាបស្មើ។ មិនត្រូវដាក់វានៅលើ ភួយ ខ្នើយ ឬ ផ្ទៃទន់ៗផ្សេងទៀតទេ ព្រោះរបស់ទាំងនេះរារាំងមិនឲ្យខ្យល់ពី ក្រៅចូលក្នុងម៉ាស៊ីនបាន។
ត្រូវទិញឧបករណ៍ផ្ដល់ធាតុត្រជាក់ (Cooler) ឬ កង្ហារជំនួយ។ បច្ចុប្បន្ននេះមានឧបករណ៍ផ្ដល់ធាតុត្រជាក់ច្រើនប្រភេទ សម្រាប់ជំនួយដល់ម៉ាស៊ីន។