អក្សរសាស្ត្រខ្មែរ: លោកទី ជីហួត ( ១៩៥២

ថ្ងៃនេះ ប្លក់សម្រាប់កូនខ្មែរ សូមលើកយកជីវប្រវត្តិលោក ទី ជីហួត ដែលជាកវីដ៏ល្បីល្បាញនាសម័យ សាធារណរដ្ឋប្រជាមានិតខ្មែរ មកបង្ហាញអ្នកសិក្សាអក្សរសាស្ត្រខ្មែរ ។

លោក ទី ជីហួត កើតនៅថ្ងៃទី ១០ ខែកុម្ភៈ ឆ្នាំ១៩៥២ នៅភូមិត្រពាំងស្លា ឃុំត្រពាំងសាប ស្រុកបាទី ខេត្តតាកែវ។ លោកបានសិក្សាដល់ថ្នាក់ទី៣ ទំនើបជាតិនាសាលាអនុវត្ត (មុនឆ្នាំ១៩៧៥)។ ចំពោះកម្រិតវប្បធម៌ លោកអាចអាន និងសរសរភាសាបារាំងបាន។ នៅឆ្នាំ១៩៧២ លោកបានចូលជាសមាជិកក្រុមអ្នកនិពន្ធខ្មែរ ។

នៅមុនឆ្នាំ១៩៧៥ ពេលកំពុងសិក្សា លោកបានប្រកបមុខរបរជាច្រើនដូចជា៖ ជាងកាត់សក់ជិតផ្សារអូរឬស្សី ដើរលក់នំប៉័ង លក់ប៉ោងៗ បម្រើតុតាមហាងដើម្បីចិញ្ចឹមក្រុមគ្រួសារក្នុងនាមជាកូនច្បង។
នៅក្រោយឆ្នាំ១៩៧៥ លោកត្រួវគេជន្លៀសទៅស្រុកខាងម្តាយ នៅភូមិកោះតូច ឃុំតាលន់ ស្រុកស្អាង ខេត្តកណ្តាលបាន៦ខែ។ បន្ទាប់មកខ្មែរក្រហមបានបញ្ជូនលោក និងក្រុមគ្រួសារឳ្យទៅនៅភូមិត្រពាំងថ្ម សង្កាត់ប៉ោយចារ ស្រុកភ្នំស្រុក ខេត្តបាត់ដំបង មានការងារជាអ្នកលាយជីលេខមួយគឺជីលាមកមនុស្ស។

ក្រោយថ្ងៃរំដោះ៧មករា១៩៧៩ លោកបានរស់នៅខេត្តសៀមរាបរយៈពេល២ខែ។ បន្ទាប់មក លោកបន្តដំណើរទៅស្រុកកំណើតខាងម្តាយជាថ្មីទៀត។ ក្រោយមកលោកបានមករស់នៅភ្នំពេញ ហើយចូលបម្រើការងារ នៅវិទ្យុជាតិកម្ពុជាមានតួនាទីជាប្រធានការិយាល័យនិពន្ធសិល្បៈ និងល្ខោន។

ចំពោះស្នាដៃរបស់លោក មុនឆ្នាំ១៩៧៥ លោកសរសេរប្រលោមលោកបានចំនួន៨រឿង។ ក្រោយឆ្នាំ១៩៧៩ លោកបាននិពន្ធប្រលោមលោក អាយ៉ៃ ល្ខោនបាសាក់ ល្ខោនយីកេ សរុបមានចំនួន១៧៦រឿង។ ក្នុងនោះមានស្នាដៃមួយចំនួនត្រូវបានបញ្ចូលក្នុងកម្មវិធីសិក្សាដូចជា៖

- រឿងតេជោយ៉ត

- រឿងវិលរកទ្រនំ

- រឿងមេឃបាត់ដួងចន្ទ។