អក្សរសាស្ត្រខ្មែរ: វិធីសាស្ត្រសរសេរតែងសេចក្តី

រៀបរៀងដោយ៖ ស៊ឹម គឹមស៊ាន សាស្ត្រាចារ្យអក្សរសាស្ត្រខ្មែរ នៃវិ.បវេល ខេត្តបាត់ដំបង

១. ដូចម្តេចហៅថាតែងសេចក្តី?

តែងសេចក្តី < តែង + សេចក្តី

តែង៖ រៀបចំ ស្អិតស្អាង តាំងបង្កើត
សេចក្តី៖ ដំណើរ ហេតុ ការណ៍

ដូច្នេះ "តែងសេចក្តី" មានន័យថាការរៀបចំពាក្យពេចន៍ ការតុបតែង រចនាឃ្លាល្បះក្នុងការសរសេររៀបរាប់ហេតុការណ៍ ឬបកស្រាយទស្សនៈណាមួយឳ្យបានសមហេតុផល ត្រឹមត្រូវ មានខ្លឹមសារប្រកបដោយផលប្រយោជន៍គួរជាទីពេញចិត្ត។

២. ប្រភេទនៃតែងសេចក្តីអត្ថាធិប្បាយ

តែងសេចក្តីអត្ថាធិប្បាយមាន៣ប្រភេទដូចជា៖

- អត្ថាធិប្បាយបែបពន្យល់

- អត្ថាធិប្បាយបែបពិភាក្សា

- អត្ថាធិប្បាយបែបប្រៀបធៀប

៣. លំណែនាំក្នុងការសរសេរ

ដើម្បីឳ្យការសរសេរតែងសេចក្តីបានល្អ អ្នកសរសេរត្រូវអនុវត្តតាមជំហានដូចខាងក្រោម៖
- អានប្រធានឳ្យបាន២ទៅ៣ដង។
- ស្វែងរកពាក្យពិបាក ឬពាក្យគន្លឹះសំខាន់ៗដែលមានក្នុងប្រធាន។ ពាក្យគន្លឹះ អាចមាន ១ពាក្យ ២ពាក្យ ឬ៣ពាក្យ។
- ស្វែងយល់ពីអត្ថន័យនៃពាក្យពិបាក ឬពាក្យគន្លឹះនីមួយៗ។

- យល់ពីប្រភេទរបស់ប្រធាន(ពន្យល់ ពិភាក្សា ឬប្រៀបធៀប)។

- យល់ពីដែនកំណត់របស់ប្រធាន(គេឳ្យលើកយករឿងអ្វីខ្លះមកបកស្រាយបញ្ជាក់)។

៤. ដំបូន្មាន

ដើម្បីឳ្យមានគំនិតទូលំទូលាយសរសេរតែងសេចក្តីបានក្បោះក្បាយល្អ អ្នកសរសេរត្រូវ៖
- ស្វែងយល់ពីហេតុការណ៍ដែលកើតមានឡើងក្នុងសង្គមបច្ចុប្បន្ន។

- អានសៀវភៅវប្បធម៌ អរិយធម៌ ប្រវត្តិសាស្ត្រ ...។

- អានស្នាដៃអក្សរសិល្ប៍មួយចំនួនដែលមានក្នុងកម្មវិធីសិក្សាដូចជា៖ រឿងកុលាបប៉ៃលិន រឿងផ្កាស្រពោន រឿងព្រះអាទិត្យថ្មីរះលើផែនដីចាស់ រឿងតេជោយ៉ត រឿងថោកែចិត្តចោរ ...។

- ស្វែងយល់ពីអត្ថន័យ អត្ថរូប និងអត្ថរសនៃរឿងនីមួយៗឳ្យច្បាស់លាស់។

- កត់ត្រាពាក្យសម្តីសំខាន់ៗរបស់តួអង្គ។
- ឧស្សាហ៍អានតែងសេចក្តីរបស់អ្នកនិពន្ធផ្សេងៗឳ្យបានច្រើន។
- ហ្វឹកហាត់សរសេរតែងសេចក្តី។