អក្សរសាស្ត្រខ្មែរ: ប្រវត្តិស្ពានកូនកាត់

I.ទីតាំង និងស្ថានភាពបច្ចុប្បន្ន

សព្វថ្ងៃស្ពាននេះក្រៅពីបាត់រូបរាងរបស់ខ្លួនហើយគឺវាស្ទើរតែបាត់ឈ្មោះ លែងមានអ្នកណាគេស្គាល់និងដឹងទៀតហើយ។ តាមការស្មានស្ពានកូនកាត់គឺប្រហែលជានៅត្រង់ម្តុំវិមានឯករាជ្យ ដែលសព្វថ្ងៃសុទ្ធសឹងជាផ្លូវថ្នល់ធំៗ និងជាសួនច្បារសម្រាប់លំអទីក្រុង។

II.ប្រវត្តិ និងទំនាក់ទំនងនៃការដាក់ឈ្មោះ

ពិនិត្យតាមស្ថានភាពដីនៃប្រទេសកម្ពុជា ឃើញថាពិតប្រាកដណាស់ដែលមានស្ពាននៅកណ្តាលទីក្រុង ព្រោះថានៅទីនោះគឺប្របនឹងមាត់ទន្លេ។ ដោយមានចម្ងល់ពីបញ្ហានេះយើងខ្ញុំក៏បានចុះធ្វើការសាកសួរព័ត៌មានខ្លះៗដែលទាក់ទិន ហើយយើងខ្ញុំក៏បានទទួលចម្លើយមួយចំនួនដូចជា៖

១. តាមមតិរបស់លោកអ៊ំស៊ិន ចាន់ថន បានរៀបរាប់ថាស្ពានកូនកាត់នេះគ្រាន់តែជាព្រែក មិនមែនជាអូរទេ ចាប់ពីត្រឹមមុខវត្តលង្ការហូតដល់វិមានឯករាជ្យ ហើយមានស្ពានឈើសម្រាប់ដើរចូលផ្ទះ។ ក្រោយមកគេចាក់ដីបាំងមុខវត្តបុទុមរហូតដល់វត្តថាន់ និងវិមានឯករាជ្យ ហើយកន្លែងនោះគឺស្ពានកូនកាត់នេះឯង។

២. ប្រសាសន៍លោកតាយក់ គុណ៖ ស្ពានកូនកាត់ប្រហែលជាកើតឡើងនៅក្នុងឆ្នាំ១៩៣៧ មានប្រវែងប្រហែល១០០ម និងទំហំ(ទទឹង) ប្រហែល ២.៥-៣ម។ វាជាស្ពានសម្រាប់ឆ្លងកាត់ផ្លូវព្រៃនគរ(ផ្លូវទៅចំការមន) ទៅវត្តភ្នំ។ ហើយគេដាក់ឈ្មោះបែបនេះពីព្រោះថា នៅកាច់ជ្រុងស្ពាន មានផ្ទះមួយដែលជាជនជាតិបារាំង តែគាត់ជាកូនកាត់យួនផង ខ្មែរផង។ ដោយសារកាត់ច្រើនសាសន៍បែបនេះហើយ ទើបគេហៅស្ពាននោះថាស្ពានកូនកាត់ដែរ ត្បិតផ្ទះរបស់គេម្នាក់នោះនៅកៀនស្ពាននេះឯង។ ស្ពាននេះប្រហែលជាត្រូវគេចាក់ដីលុបនៅខ្ទង់ឆ្នាំ១៩៥៤-៥៥ ដើម្បីធ្វើជាសួនច្បារ។

៣. ភិក្ខុ រស់ យ៉ាន ព្រះជន្ម ៦៥វស្សា គង់នៅវត្តប្រលោមបានមានសង្ឃដីកាថា ស្ពានកូនកាត់ស្ថិតនៅខាងត្បូងវិមានឯករាជ្យ គឺចាប់ពីមាត់ទន្លេរហូតដល់សួនច្បារមុខវត្តបុទុម មានរូបរាងជាស្ពានឈើ ឈរពីលិចទៅកើត ហើយវាបាត់រូបរាងប្រហែលជានៅឆ្នាំ១៩៥៣។

៤.លោកអ៊ំ ស៊ុំ សម័យ បានមានប្រសាសន៍ថា៖ ស្ពានកូនកាត់ស្ថិតនៅជាប់ផ្លូវទៅវិមានឯករាជ្យ។ ស្ពាននេះធ្វើពីស៊ីម៉ង់ត៍ ពីដើមជាអូរ ហើយគេក៏រៀបចំធ្វើស្ពានកូនកាត់នេះដើម្បីឆ្លងកាត់វាតែប៉ុណ្ណឹងឯង។

៥. លោកចៅអធិការវត្តលង្ការដែលមានព្រះជន្ម ៨៦វស្សា បានលើកឡើងថា នៅម្តុំវិមានឯករាជ្យនេះពិតជាមានស្ពានមួយមែន ព្រោះត្រង់កន្លែងនេះសុទ្ធសឹងជាអូរ ហើយស្ពានគឺលាតសន្ធឹងពីមុខវត្តលង្ការរហូតដល់ដើមពោធិ៍ធំមួយនៅក្បែរវិមានឯករាជ្យ តែដើម្បីសង់វិមានឯករាជ្យ គេក៏បានលុបអូរនះទៅ។

III.សន្និដ្ឋាន

ទោះបីជាមានការលើកឡើងច្រើនបែបនេះក៏ដោយ ក៏យើងមិនអាចសន្និដ្ឋានបានថា រូបរាងស្ពានពិតប្រាកដនោះលាតសន្ធឹងពីណាដល់ណាទេ ហើយមូលហេតុអ្វីដែលនាំឳ្យមានឈ្មោះស្ពានកូនកាត់នេះ ព្រោះថាមនុស្សភាគច្រើនគឺគ្រាន់តែដឹងថាមានៗ តែមិនបានដឹងឳ្យប្រាកដថានៅកន្លែងណាពិតប្រាកដនោះឡើយ ហើយវាក៏ឆ្លងកាត់អស់ជាច្រើនជំនាន់ទៀតផង ដូច្នេះវាមានការផ្លាស់ប្តូរទាំងរូបរាង ទាំងស្លាកស្នាម និងប្រជាជនដែលបានដឹងឮ។ ប៉ុន្តែទោះជាយ៉ាងនេះក្តី វាក៏បានបង្ហាញឳ្យយើងបានដឹង និងស្គាល់ពីរឿងរ៉ាវនិងស្ថានភាពរបស់វាដែរ។

អក្សរសាស្ត្រខ្មែរ

Wednesday, March 4, 2015

ប្រវត្តិស្ពានកូនកាត់

No comments:

Post a Comment

សូមស្វាគមន៍

ទំព័រ