សីលធម៌សុំញ៉ម

១. ផ្ទះថ្មល្អហួសពីការស្មាន                           ក្បែរផ្ទះមានឡានចតសេសសល់

ម្ចាស់ផ្ទះឈរស្ទែតមើលមកថ្នល់                    ចុះផលបុណ្យអ្វីរបស់គេ! ។

២. ឡានតូចថ្មីចែសបើកដំបូល                      ចេញចូលលូនលេងគ្មានទំនេរ

ថ្ងៃល្ងាចលោកប្រុស-ស្រីទាំងទ្វេ                     សង្ហាម្ល៉េះទេគេធ្វើអ្វី ? ។

៣. ទំនិញទំនើបពីបរទេស                            សុទ្ធល្អវិសេសផុតដែនដី

គេតែងនិយមទាំងប្រុសស្រី                          ធ្វើអ្វីបានប្រាក់ទិញដូចចិត្ត ? ។

៤. ភាពយន្តទំនើបបង្ហាញច្បាស់                    ឃើញណាស់តែអ្វីដែលប្រណិត

ខ្លួនក្រចិត្តលូតហួសកំហិត                            តើគិតម្តេចផ្គាប់ស្កប់តណ្ហា ។

៥. បារមានហូរហែពេញទីក្រុង                      រាំឳបចិត្តស្លុងក្នុងកាមា

គិតម្តេចឳ្យបានស្រីស្រា                               នរណារស់ស្លាប់កុំខ្ចីខ្វល់! ។

៦. រដូវមួយណាក៏ផ្កាស្រស់                           ផ្ការីទាំងអស់ឥតសេសសល់

ឳ្យតែផ្គាប់ចិត្តផ្កាដិតដល់                              ខ្វះលុយកុំឆ្ងល់ចៀសឳ្យឆ្ងាយ! ។

៧. ផ្ទះថ្ម ឡាន កុន បារ ស្រស់ស្រី                 ឋានសួគ៌លោកិយសែនសប្បាយ

សង្ឃឹមប្រាក់ខែម្តេចគ្រប់ចាយ                       ត្រូវតែខ្វល់ខ្វាយខំ «រកស៊ី» ! ។

៨. ឳសីលធម៌អើយ! អ្នកកុំច្បាំង                    តតាំងម្តេចឈ្នះឆោមនារី

អញ្ជើញដកខ្លួនចូលគម្ពីរ                              ទុកទីជូនទៅទ័ពតណ្ហា ។

                                                               ភ្នំពេញ ២៤ មិថុនា ១៩៦៥