អាសូរដើមដូង

១. យូរហើយដូងដុះក្នុងភូមិម្ក                                ដើមធាងលូតល្អមានផ្លែផ្កា

ស្រាប់គេផ្តាច់ឬសផ្តាច់អាហារ                              គេថាគាស់ដឹកយកទៅដាំ! ។

២. ល្ងាចនេះដូងដុះក្បែរសាលា                            លោកអ្នករាជការខំថែទាំ

តុបតែងស្រោចទឹកយ៉ាងជោគជាំ                           ថ្នាក់ថ្នមមុតមាំខ្លាចដូងដួល ។

៣. ព្រឹកឡើងបុណ្យសម្ពោធសាលា                      មនុស្សមូលខ្ញៀវខ្ញាមីរខ្មាញ់ខ្មួល

ញញឹមប្រិមប្រិយចាំទទួល                                    ស្រុះស្រួលចោមជុំសម្តេចឪ ។

៤. ដើមដូងដាច់ឬសសប្បាយដែរ                          រេរាំហូរហែតាមក្បែរផ្លូវ

ញញឹមស្វាគមន៍សម្តេចឪ                                     មើលអស់លោកត្រូវបានមេដៃ ។

៥. ព្រឹកដ៏រីករាយកន្លងទៅ                                    ដូងនៅម្នាក់ឯងកណ្តាលថ្ងៃ

សូរ្យសែងក្តៅដុតគ្មានសំចៃ                                   ដូងក្ស័យចោលរូបកណ្តាលក្រុង ។

                                                    ភ្នំពេញ ថ្ងៃទី១២ កក្កដា ១៩៦៥